Ný skýrsla Íslandsbanka um íslenska ferðaþjónustu

04.03.2015
Íslandsbanki gefur nú í fyrsta sinn út greiningarskýrslu um íslenska ferðaþjónustu. Bankinn gefur reglulega út sambærilegar skýrslur um sjávarútveg, orku og sveitarfélög. Í skýrslunni er leitast við að gefa góða innsýn í stöðu ferðaþjónustunnar á Íslandi, efnahagsleg áhrif, hótelgeirann, bílaleigumarkaðinn og afþreyingartengda þjónustu. Hér er hægt að nálgast skýrsluna.

Ferðaþjónustan stór þáttur í endurreisninni

Sá mikli vöxtur sem verið hefur í ferðaþjónustunni síðustu ár skýrir stóran hluta af þeim hagvexti sem mælst hefur hér á landi síðan hagkerfið byrjaði að taka við sér árið 2010. Áætlar Greining Íslandsbanka að a.m.k. þriðjung hagvaxtarins frá árinu 2010 megi rekja til ferðaþjónustunnar. Ferðaþjónustan hefur þannig átt stóran þátt í því endurreisnarstarfi sem átt hefur sér stað á undanförnum árum.

Í heild hefur störfum í hagkerfinu fjölgað um 10.300 á tímabilinu og eru 4.600 þeirra sem sinna þessum störfum starfandi í flutningum með flugi, á ferðaskrifstofum og í rekstri gisti- og veitingastaða. Það má því rekja um 45% af fjölgun starfandi á tímabilinu til ferðaþjónustunnar. Eru þá ótaldar tengdar greinar og hlutfallið því eflaust vanmetið. Vöxtur í ferðaþjónustunni hefur því átt ríkan þátt í að ná niður atvinnuleysi hér á landi.

Greining Íslandsbanka áætlar að ferðaþjónustan muni afla 342 ma.kr. í gjaldeyristekjur á árinu 2015 eða sem nemur 28,9% af áætluðum gjaldeyristekjum af útflutningi vöru og þjónustu á árinu. Til samanburðar var þessi hlutdeild 23,8% árið 2012 og 19,8% árið 2009.

Mikil fjölgun ferðamanna

Greining Íslandsbanka spáir því að fjöldi ferðamanna sem kemur hingað til lands um Leifsstöð á árinu 2015 verði um 1.191 þúsund, sem er aukning um tæplega 23% á milli ára. Má áætla að heildarfjöldi ferðamanna verði um 1.350 þúsund á árinu eða rúmlega fjórfaldur fólksfjöldi landsins. Fátítt er að hlutfall ferðamanna í samanburði við íbúafjölda sé svo hátt meðal ríkja heims. Meðaleyðsla erlendra ferðamanna á hverja gistinótt á veturna er um 18,7 þúsund krónur, en um 12,1 þúsund krónur á sumrin. Þegar horft er á einstaka þjóðir eyða Norðmenn mestu á hverja gistinótt, eða um 29 þúsund krónum á sumrin og um 37 þúsund krónum á veturna.

Nýtingahlutfall gistinátta í sögulegu hámarki

Greining Íslandsbanka spáir því að gistinætur á heilsárshótelum hér á landi verði um 2,7 milljónir á árinu 2015 samanborið við 2,3 milljónir árið áður. Frá árinu 2010 hefur nýtingarhlutfall hótelherbergja hækkað úr 47% í 67% á Íslandi. Nýtingarhlutfall á höfuðborgarsvæðinu var um 84% á árinu 2014. Þrátt fyrir að áætlanir um 700 ný hótelherbergi á höfuðborgarsvæðinu gangi eftir er útlit fyrir að nýtingarhlutfall verði áfram í sögulegu hámarki á árinu 2015.

Samanburður á nýtingu og verði hótelherbergja í Reykjavík og í helstu ferðamannaborgum Evrópu sýnir að nýting er töluvert yfir meðallagi en verð undir meðallagi. Í Reykjavík hefur nýtingarhlutfall aukist þrátt fyrir verðhækkanir. Talsverð uppbygging er framundan í hótelum á höfuðborgarsvæðinu. Er útlit fyrir að fjöldi hótelherbergja á svæðinu verði um 4.500 á árinu 2016 sem er 33% aukning frá núverandi stöðu.

Bílaleigubílar nær helmingur seldra bíla

Fjöldi starfsleyfa til reksturs bílaleiga hefur þrefaldast frá árinu 2003, úr 51 í 151 árið 2014. Helst það í hendur við fjölgun ferðamanna sem er einnig þreföld á sama tímabili. Fjöldi bílaleigubíla yfir háannatímann var 12.179 árið 2014 miðað við 4.756 árið 2006. Árið 2015 er spáð að þeir verði um 14.000 talsins. Við aldursgreiningu á bílaleiguflotanum sést að hann er tiltölulega nýlegur, en 36% af bílaleigubílum voru nýir bílar í útleigu á árinu 2014. Þá eru 86% af flotanum 5 ára bílar eða yngri. Til samanburðar voru aðeins 13% af heildarbílaflota landsmanna 5 ára bílar eða yngri árið 2013.

Sala á nýjum bílum féll árið 2009 frá því sem hafði verið mörg ár þar á undan, og hlutfall bílaleigubíla af heildarsölunni jókst. Það hefur haldist þannig síðan og að meðaltali frá 2009-2014 hafa bílaleigubílar staðið undir 42% af sölu nýrra bíla. Aðeins 4 bílategundir mynda 50% flotans og 82% flotans samanstendur af 9 tegundum.

Íslandsbanki og ferðaþjónustan


Íslandsbanki býður einstaklingum, heimilum, fyrirtækjum og atvinnufjárfestum alhliða fjármálaþjónustu. Á fyrirtækjasviði Íslandsbanka hafa um árabil starfað sérstök teymi með sérhæfingu í sjávarútvegi, orku og sveitarfélögum. Sérstakt ferðaþjónustuteymi er nú einnig starfandi innan fyrirtækjasviðs ásamt ferðaþjónusturáði sem samanstendur af fjölbreyttum hópi úr ýmsum deildum bankans.

Á undanförnum árum hafa mörg af stærstu og öflugustu ferðaþjónustufyrirtækjum á Íslandi verið á meðal viðskiptavina Íslandsbanka. Í árslok 2014 voru lán til fyrirtækja í ferðaþjónustu um 15% af lánasafni bankans. Fyrirtæki í ferðaþjónustu sem eru í viðskiptum við bankann eru yfir 500 talsins. Það er því ljóst að ferðaþjónusta sem atvinnugrein er bankanum afar mikilvæg.

Nýjustu fréttir

Íslandsbanki gefur út skuldabréf fyrir 300 milljónir evra og tilkynnir um endurkaup á hluta af eldra skuldabréfi

04.04.2019 - Kauphöll
Íslandsbanki hefur í dag gefið út skuldabréf að fjárhæð 300 milljónir evra (um 40 milljarðar íslenskra króna) til 3 ára. Bréfið ber 1,125% fasta vexti...Nánar

Aðalfundur Íslandsbanka 2019 - dagskrá, aðilar í framboði og tillögur

19.03.2019
Aðalfundur Íslandsbanka verður haldinn fimmtudaginn 21. mars 2019, kl. 15:00 í höfuðstöðvum bankans á 9. hæð Norðurturns að Hagasmára 3, 201 Kópavogi...Nánar

Íslandsbanki með átta tilnefningar til Lúðursins

28.02.2019
Íslandsbanki er með átta tilnefningar til Lúðurins ásamt því að vera tilnefndur til ÁrunnarNánar

Aðalfundur Íslandsbanka

25.02.2019
Aðalfundur Íslandsbanka verður haldinn fimmtudaginn 21. mars 2019.Nánar

Sparað fyrir barneignum

20.02.2019
Tekjutap aðila með meðaltekjur í 6 mánaða fæðingarorlofi nemur um 640.000 krónum. Við þetta bætast 400.000 krónur í töpuðum séreignarsparnaði. Ástæðan...Nánar

Íslandsbanki hefur gefið út ársskýrslu og áhættuskýrslu (Pillar 3) fyrir árið 2018

13.02.2019 - Kauphöll
Íslandsbanki hefur gefið út ársskýrslu og áhættuskýrslu fyrir árið 2018. Nánar

Ársuppgjör 2018

13.02.2019 - Kauphöll
Afkoma bankans og Íslandssjóða var ágæt á árinu og skilaði samstæðan hagnaði upp á 10,6 ma. kr. en erfiður rekstur annarra dótturfélaga dró heldur úr...Nánar
Netspjall